Los Payis-Bâs, en fôrma longe lo Reyômo des Payis-Bâs, (en nêrlandêsNederland et Koninkrijk der Nederlanden) sont un payis d’Eropa du Cuchient, frontaliér avouéc la Bèlg·ica u mié-jorn et les Alemagnes u levant. Sont govèrnâs per na monarch·ie constitucionâla et comptont prés de diéx-et-sèpt milyons d’habitents. La capitâla des Payis-Bâs est Amstèrdame, ben que lo govèrnament et lo Parlement seyont a L’Hage. Administrâ en doze provinces, lo payis at asse-ben siéx tèrritouèros d’outre-mar que sè trôvont dedens les Carâibes. L’hôtior moyena des Payis-Bâs est brâvament fêbla : un quârt du tèrritouèro est desot lo nivél de la mar de Bise, que lo bâgne u cuchient et a bise. Los payisâjos nêrlandês tipicos sont per alyor constituâs de « lârges reviéres que colont tranquilament a travèrs de les planes sen fin », d’aprés lo poèto Hendrik Marsman. Portant, les tèrres litorâles sont por la plepârt protègiêes per de digues construites u fil de l’histouère du payis a côsa de tot plen de catastrofes naturèles liyêes a l’égoua recensâyes. Cél diton cognu ux Payis-Bâs pôt rèsumar la situacion du payis : « Diô at crèâ lo Mondo et los Nêrlandês ant fêt los Payis-Bâs ». Lo nom Holanda est sovent empleyê dens lo lengâjo corent, et de façon que convint pas, por dèsignér los Payis-Bâs dens lor ensemblo. Cel’apelacion dèsigne na partia du cuchient du payis.